Dr Drugg

Die hittig Zytt isch präggt vo Drugg im Drugg bisch nid elei
Ob Gsellschafts-Drugg, Drugg bim Schaffe und dr Drugg dehei
Au uf dr Schüssle herrscht dr Drugg E Huffe häns dert sträng
S Einzig wo’s kai Drugg me git, das isch bim Rädäbäng

D Inklusion

Inklusion isch zytgemäss dr Gsellschaft isch das wichtig
Alli mitme Defizitt uffnä das isch richtig
Basel ibernimmt do schwizwitt bi däm Thema d Fiehrig
Die mitem greeschte Defizit, die wählt me in d Regierig

E Reisli

Dr Karl sait: hitt mach ych e Reis, gwiss wird’s e zimftig langi
Ha gluschtig proviant drbii und mitem Auti gangi
No viele Autistunde, uff dr Bloose herrscht e Drugg
Dr Karl dä hetts jetzt ändlig gschafft iiber d Schwarzwaldbrugg

Zöll

D Wirtschaft stoggt, d Kasse leer, es fählt an alle Egge
Gwüssi Gleen hänn s Gfühl mit Zöll kasch s Defizit abdegge
Und jeede wo mol falsch abbiegt, dä duet me sofort mälde
Mir nennes drogge: Stasi-Stadt, ihr kennets als Birsfälde

D Hauptpost

Dr Konradin dä paggt si Kram – er sait zu sine Lytt:
Kai Bammel, will am neye Ort dert schaffe mir au nytt
Dr Pöbel brucht kei Kaffi in dr tüüre Hauptposcht dinn
Für mi macht dert e goldig glänzend’ Ballsaal viel meh Sinn

D Kroone

Z Pariis im Louvre, oh mondiööö, d Krone isch verschwunde
Me hettsi denn noch kurzer Zytt am Bode wieder gfunde
Mir glaube, was si gfunde hänn isch sicher e Kopie
S Orginal drait s Cramerli wil är mecht Keenig sii

Dr Helikoptr

Abgholt mitm Heelikoptr das wird dr Maduuro
Dr Trump grifft ii und sait das Land, das muess emoll ind Spuur ko
Mir mälde uns z Ameerika, au do kenntsch ain ko hoole
Dr Stadtdiktator Cramer hett z Pariis e Krone gstoole

Dr Algorhythmus

D Zircher wänn mit KI neu go Gsichter iiberwache
Me kritisiert gärn China aber mechts jetzt sälber mache
S Problem bim Algorhythmus das isch simpel zum benenne
D Datebangg isch voller Gsichter Ärsch kas nidd erkenne

Kurzes Lääbe

E kürzers Lääbe hänn mir Männer, Gründ gitts allerlai
Muet und Liichtsinn liige noch und Bier am liebschte zwai
Nidd alles hett me in dr Hand, doch neyme kennt me’s ha
Wenn Fraue frieh dien stärbe, denn ligt d Schuld au oft bim Maa

Warmi Eier

Zem dr Daigg im Stadion, kenne stimuliere
Isch me glatt ind Logeplätz go Heizige montiere
S Resultat zum Saison-Änd isch schytter und es stööri
Verdroggnet bruuni Läderhutt wie bidr Gigi Oeri

Pokal

e Friidenspriis für e Trump, d FIFA duet ihn ehre
wär soviel für e Friide duet, vo däm kasch no vyyl lehre
Dr Vatikan dä styggt au ii, ehrt postum dr Erfinder
Dr Jeffrey Epstein fir s Konzäpt im Umgang mit de Kinder

Ortsnaame

Wählsch fir e Ort e Namme uss, muesch gwissehaft bedängge
As wenn dr Namme Programm wird, sichs uf dä duet beschrängge
Schöönebuech isch schuurig schön, in Glattbrugg hänn sis glatt
Dr Aargau liggt im Aarge und, Blatte isch jetzt platt

Scrolle

Di Daag foht ah du sehsch als erschts di Display strahle
wirsch iiberhüfft vo schlächte News und schlächte Zahle
Uffem Händy scrollsch du dur e ändloos Gschicht
und du merksch nid, as das Grät di langsam bricht

Währendem Scrolle poppt e Fänschter uff, e glains
Es sait zu dir klick mi ah s gitt zwai fir ains
Us Versehe kliggsch dert druf und jetzt hesch vier
Und wennd ehrlig bisch bruuche duesch ekains
 
Bim Fänschter schliesse kunnt e neui Mäldig iine
Si isch vo Tinder e Mätsch mit dr Sabiine
Zimmlig schnäll schribbt si dir: wämmers zämme driibe
Nur laider hesch du mit’me Bot die ganz zyt gschriibe
 
Apropos Bot, do griegsch jetzt augebligglig d Kriise
As du e Mensch bisch und kai Bot muesch zersch bewiise
Und als wär das nidd scho gnueg, s wird immer flotter
Dass d e Mensch bisch das bewiisisch em Robotter

E Prinz us Lagos schribbt dir zärtlig, fascht poetisch
As är di liebt und as du neu jetzt au si Date bisch
S stellt sich uuse as dä armi ma in Not isch
As d betrooge worde bisch merksch wennsscho zspoot isch
 
Noch sonre Schlappe muesch du di zersch neu sortiere
Drumm machsch e schmuddelsytte n uff zem Onaniere
Du haggsch ind Taschte mit dr Pfyffe in dr Hand
Das het jetzt grad no gfählt – PASSWORD UNBEKANNT
 
Bi Telegram hesch du e tolli Gruppe gfunde
D Faggte ziehn di iine, so vergöhn die Stunde
S git kei Wooret und au d Faggte sinn flexibel
Das isch sicher kai Verschweerig, s isch plausibel
 
Binre Community isch di Sohn drbi
Är mecht au mol Teil vo ebbis Grossem syy
Du bisch skeptisch isch är uf em rächte Pfad
Är isch jetz fire Koran und s Kalifat

Di Daag goht z änd du sehsch als Ledschds di Display schyyne
Noch so viil Bildschirmzytt goht nitt me in di ine
Du leggschs ewägg denn machts *DING* s isch nid lang gange
Und bevordes merggsch hetts Grät di wieder gfange.

Und ihr diend scrolle ihr diend scrolle ihr diend scrolle
Ihr diend scrolle ihr diend scrolle noonemolle
Ihr diend scrolle und verliered so d Kontrolle
Wenn ihr diend scolle, scrolle, scrolle